Последование

великого освящения воды

Святых Богоявлений, 1884 год.

 

Дорогие братья и сестры!

Поздравляю вас с праздником Крещения Господа нашего Иисуса Христа!

В этот день после Божественной Литургии служится Водосвятный молебен или Последование великого освящения воды Святых Богоявлений.

С молитвенным текстом этого Последования,  вы сможете познакомиться как только прочтете этот небольшой комментарий. А пока, лишь обращаю ваше внимание, что в нём (в этом тексте) заключена вся полнота богословских смыслов, которые важны для нашего спасения.

Царская тема звучит здесь особенно сильно и выразительно. Так словесно обращались к Богу в Российской Империи. Архиереи и священники, свято исполняя свой долг и храня верность присяге, молились о спасении Государя Императора и всей Его Семьи вместе с Царствующим Домом.

К сожалению после 1917 года этот текст претерпел изменения, хотя многое сохранилось, например, остались неизменными Паремии, Апостол и Евангелие.

Вы можете сравнить этот текст с современным его вариантом, который находится в Требнике, изданном в конце 20 века или в начале 21-го. Проведя обычное сравнение, которое может осуществить любой школьник, вы сможете поразмышлять над всем этим, если пожелаете.

Понятно, что воду Господь освящает для нас грешных и в современном молитвенном варианте по Своей неизреченной милости. Но, значит ли это, что нам не нужно задумываться над истинностью образа нашей молитвы?

В искусстве существуют понятия подлинника и копии. Только вот, если современный молитвенный вариант назвать копией Царского текста, который вы сейчас видите ниже, то напрашивается вопрос: “А почему тогда современная его копия неточна? Или кто-то копировал по своему революционному произволению?

 

Послѣ́дованіе вели́каго освяще́нія воды́ Святы́хъ Богоявле́ній. 1884 г.

По е́же рещи́ свяще́ннику заамво́нную моли́тву, исхо́димъ вси́ ко крести́льницѣ, предыду́щимъ свѣщено́сцемъ, по ни́хъ же діа́кономъ и свяще́нникомъ со Ева́нгеліемъ и кади́ломъ. Бра́тіи пою́щимъ настоя́щія тропари́ сія́, Гла́съ 8:

Гла́съ Госпо́день на вода́хъ вопіе́тъ, глаго́ля:* пріиди́те, пріими́те вси́* Ду́ха прему́дрости,* Ду́ха ра́зума,* Ду́ха стра́ха Бо́жія,* я́вльшагося Христа́. [Три́жды.]

Дне́сь во́дъ освяща́ется естество́,* и раздѣля́ется Іорда́нъ,* и свои́хъ во́дъ возвраща́етъ струи́,* Влады́ку зря́ креща́ема. [Два́жды.]

Яко Человѣ́къ, на рѣку́ прише́лъ еси́, Христе́ Царю́,* и ра́бское креще́ніе прія́ти тщи́шися, Бла́же,* отъ Предте́чеву руку́* грѣ́хъ ра́ди на́шихъ, Человѣколю́бче. [Два́жды.]

Сла́ва, и ны́нѣ, гла́съ то́йже:

Ко гла́су вопію́щаго въ пусты́ни:* угото́вайте пу́ть Госпо́день,* прише́лъ еси́, Го́споди, зра́къ ра́бій пріи́мъ,* креще́нія прося́, не вѣ́дый грѣха́.* Ви́дѣша Тя́ во́ды и убоя́шася.* Тре́петенъ бы́сть Предте́ча и возопи́, глаго́ля:* ка́ко просвѣти́тъ свѣти́льникъ Свѣ́та?* Ка́ко ру́ку положи́тъ ра́бъ на Влады́ку?* Освяти́ мене́ и во́ды, Спа́се, взе́мляй мíра грѣ́хъ.

И а́біе, ста́въ у крести́льницы, глаго́летъ діа́конъ: Прему́дрость.
И чте́цъ: Проро́чества Иса́іина чте́ніе. [Глава́ 35.]

Та́ко глаго́летъ Госпо́дь: да возвесели́тся пусты́ня жа́ждущая, да возра́дуется пусты́ня и процвѣте́тъ, я́ко кри́нъ, и да прозя́бнетъ, и вся́ возвеселя́тся. И возра́дуются пусты́нная Іорда́нова, и сла́ва Лива́нова дана́ бы́сть е́й и че́сть Карми́лова, и лю́діе Мои́ у́зрятъ сла́ву Госпо́дню и высоту́ Бо́жію. Укрѣпи́теся, ру́ки осла́бленныя, и, колѣ́на разсла́бленная, утѣ́шитеся, и рцы́те малоду́шнымъ мы́слію: укрѣпи́теся и не бо́йтеся, се́ Бо́гъ на́шъ су́дъ воздае́тъ, То́й пріи́детъ и спасе́тъ на́съ. Тогда́ отве́рзутся очеса́ слѣпы́хъ, и ушеса́ глухи́хъ услы́шатъ, тогда́ ско́читъ хро́мый, я́ко еле́нь, и я́сенъ бу́детъ язы́къ гугни́выхъ, я́ко прорази́ся въ пусты́ни вода́ и де́брь въ земли́ жа́ждущей. И бу́детъ безво́дная въ бла́та, и въ жа́ждущей земли́ исто́чникъ воды́ бу́детъ. Та́мо бу́детъ весе́ліе пти́цъ, водворе́ніе си́риновъ, и тро́стій, и бла́та. Та́мо бу́детъ пу́ть чи́стъ, и пу́ть свя́тъ нарече́тся. И не мимои́детъ та́мо нечи́стъ, ниже́ бу́детъ та́мо пу́ть нечи́стый, разсѣ́янніи же по́йдутъ по нему́ и не заблу́дятъ. И не бу́детъ та́мо льва́, ниже́ отъ звѣре́й лю́тыхъ взы́детъ на́нь, ниже́ обря́щется та́мо, но по́йдутъ по нему́ изба́вленніи и со́бранніи отъ Го́спода, и обратя́тся, и пріи́дутъ въ Сіо́нъ съ весе́ліемъ и ра́достію, и весе́ліе вѣ́чное надъ главо́ю и́хъ. Хвала́, и ра́дованіе, и весе́ліе пости́гнетъ и́хъ, отбѣже́ болѣ́знь, печа́ль и воздыха́ніе.

Проро́чества Иса́іина чте́ніе. [Глава́ 55.]

Та́ко глаго́летъ Госпо́дь: жа́ждущіи, на во́ду иди́те, и, ели́цы не и́мате сребра́, ше́дше, купи́те, и яди́те и пíйте безъ сребра́ и цѣны́ вино́ и ту́къ. Вску́ю цѣните́ сребро́ не въ хлѣ́бы и тру́дъ ва́шъ не въ сы́тость? Послу́шайте Мене́ и снѣ́сте блага́я, и наслади́тся во благи́хъ душа́ ва́ша. Внима́йте уши́ма ва́шима и послѣ́дуйте путе́мъ Мои́мъ, услы́шите Мене́, и жива́ бу́детъ во благи́хъ душа́ ва́ша. И завѣща́ю вамъ завѣ́тъ вѣ́ченъ, преподо́бная Дави́дова вѣ́рная. Се свидѣ́тельство во язы́цѣхъ, да́хъ Его́ Кня́зя и Повели́теля во язы́цѣхъ. Се язы́цы, и́же не вѣ́дяху Тя́, призову́тъ Тя́, и лю́діе, и́же не позна́ша Тя́, къ Тебѣ́ прибѣ́гнутъ, ра́ди Го́спода Твоего́ и Свята́го Изра́илева, я́ко просла́вихъ Тя́. Взыщи́те Бо́га, и внегда́ ва́мъ обрѣсти́ Его́, призови́те. Егда́ же а́ще прибли́жится ва́мъ, да оста́витъ нечести́вый пути́ своя́ и му́жъ беззако́нный совѣ́ты своя́. И обрати́теся ко Го́споду Бо́гу ва́шему и поми́ловани бу́дете, я́ко помно́гу оста́витъ грѣхи́ ва́ша. Не су́ть бо совѣ́ти Мои́, я́коже совѣ́ти ва́ши, ниже́ я́коже путіе́ ва́ши, путіе́ Мои́, — глаго́летъ Госпо́дь. — Но я́коже отстои́тъ не́бо отъ земли́, та́ко отстои́тъ пу́ть Мо́й отъ путе́й ва́шихъ, и размышле́нія ва́ша отъ мы́сли Моея́. Якоже бо а́ще сни́детъ до́ждь или́ снѣ́гъ съ небесе́ и не возврати́тся отту́ду, до́ндеже упои́тъ зе́млю, и роди́тъ, и прозя́бнетъ, и да́стъ сѣ́мя сѣ́ющему и хлѣ́бъ въ снѣ́дь, та́ко бу́детъ глаго́лъ Мой, и́же а́ще изы́детъ изъ у́стъ Мои́хъ и не обрати́тся ко Мнѣ́ то́щь, до́ндеже а́ще сконча́етъ вся́, ели́ка восхотѣ́хъ, и поспѣшу́ пути́ Моя́ и повелѣ́нія Моя́. Весе́ліемъ бо изы́дете и ра́достію научи́теся, го́ры бо и хо́лми ско́чатъ, жду́ще ва́съ въ ра́дости, и вся́ древеса́ се́льная воспле́щутъ вѣ́твьми. И вмѣ́сто дра́чія взы́детъ кипари́съ, вмѣ́сто же кропи́вы взы́детъ мѵрси́на. И бу́детъ Госпо́дь во и́мя и въ зна́меніе вѣ́чное и не оскудѣ́етъ.

Проро́чества Иса́іина чте́ніе. [Глава́ 12.]

Та́ко глаго́летъ Госпо́дь: почерпи́те во́ду съ весе́ліемъ отъ исто́чниковъ спасе́нія. И рече́ши въ де́нь о́нъ: исповѣ́дайтеся Го́сподеви и призови́те и́мя Его́. Возвѣсти́те во язы́цехъ сла́ву Его́, помяни́те, я́ко вознесе́ся и́мя Его́. По́йте и́мя Госпо́дне, я́ко высо́кая сотвори́. Возвѣсти́те сія́ по все́й земли́, ра́дуйтеся и весели́теся, живу́щіи въ Сіо́нѣ, я́ко вознесе́ся Святы́й Изра́илевъ посредѣ́ его́.

Діа́конъ: Прему́дрость. Чте́цъ: Проки́менъ, гла́съ 3: Госпо́дь просвѣще́ніе мое́ и Спаси́тель мо́й,* кого́ убою́ся? Сти́хъ: Госпо́дь Защи́титель живота́ моего́, отъ кого́ устрашу́ся?

Апо́столъ: Къ Кори́нѳяномъ посла́нія свята́го апо́стола Па́вла чте́ніе. [Зача́ло 143 отъ полу́.]

Бра́тіе, не хощу́ ва́съ не вѣ́дѣти, я́ко отцы́ на́ши вси́ подъ о́блакомъ бы́ша и вси́ сквозѣ́ мо́ре проидо́ша. И вси́ въ Моисе́я крести́шася во о́блацѣ и въ мо́ри: И вси́ то́жде бра́шно духо́вное ядо́ша. И вси́ то́жде пи́во духо́вное пи́ша, пія́ху бо отъ духо́внаго послѣ́дующаго ка́мене, ка́мень же бѣ́ Христо́съ.

Аллилу́ія, гла́съ 4: Гла́съ Госпо́день на вода́хъ. Сти́хъ: Бо́гъ сла́вы возгремѣ́, Госпо́дь на вода́хъ мно́гихъ.

Діа́конъ глаго́летъ: Прему́дрость, про́сти, услы́шимъ свята́го Ева́нгелія.
Свяще́нникъ: Отъ Ма́рка свята́го Ева́нгелія чте́ніе. [Зача́ло 2.]

Во вре́мя о́но пріи́де Іису́съ отъ Назаре́та Галиле́йскаго и крести́ся отъ Іоа́нна во Іорда́нѣ. И а́біе восходя́ отъ воды́, ви́дѣ разводя́щася небеса́ и Ду́хъ, я́ко го́лубь, сходя́щь На́нь. И гла́съ бы́сть съ небесе́: Ты́ еси́ Сы́нъ Мо́й возлю́бленный, о Не́мже благоволи́хъ.

Діа́конъ же глаго́летъ ектенію́:

Ми́ромъ Го́споду помо́лимся.

Ли́къ: Го́споди поми́луй. [То́же пое́тся по ка́ждомъ проше́ніи.]

Діа́конъ: О свы́шнѣмъ ми́рѣ, и спасе́ніи ду́шъ на́шихъ, Го́споду помо́лимся.

О ми́рѣ всего́ мíра, благостоя́ніи святы́хъ Бо́жіихъ церкве́й, и соедине́ніи всѣ́хъ, Го́споду помо́лимся.

О святѣ́мъ хра́мѣ се́мъ, и съ вѣ́рою, благоговѣ́ніемъ и стра́хомъ Бо́жіимъ входя́щихъ въ о́нь, Го́споду помо́лимся.

О Святѣ́йшемъ Прави́тельствующемъ Сѵно́дѣ, [и о митрополи́тѣ на́шемъ [имяре́къ], его́же о́бласть], честнѣ́мъ пресви́терствѣ, во Христѣ́ діа́конствѣ, о все́мъ при́чтѣ и лю́дѣхъ, Го́споду помо́лимся.

О Благочести́вѣйшемъ, Самодержа́внѣйшемъ, Вели́комъ Госуда́рѣ на́шемъ Импера́торѣ [имяре́къ] всея́ Россíи; о Супру́гѣ Его́, Благочести́вѣйшей Госуда́рынѣ Императри́цѣ [имяре́къ]; о Ма́тери Его́, Благочести́вѣйшей Госуда́рынѣ Императри́цѣ [имяре́къ], Го́споду помо́лимся.

О Наслѣ́дникѣ Его́, Благовѣ́рномъ Госуда́рѣ, Цесаре́вичѣ и Вели́комъ Кня́зѣ [имяре́къ], и о все́мъ Ца́рствующемъ До́мѣ, о все́й пала́тѣ, и во́инствѣ Ихъ, Го́споду помо́лимся.

О пособи́ти и покори́ти подъ но́зѣ Ихъ вся́каго врага́ и супоста́та, Го́споду помо́лимся.

О гра́дѣ се́мъ, [аще въ монастырѣ́: О святѣ́й оби́тели се́й,] вся́комъ гра́дѣ и странѣ́, и вѣ́рою живу́щихъ въ ни́хъ, Го́споду помо́лимся.

О благорастворе́ніи возду́ховъ, о изоби́ліи плодо́въ земны́хъ, и вре́менѣхъ ми́рныхъ, Го́споду помо́лимся.

О пла́вающихъ, путеше́ствующихъ, неду́гующихъ, стра́ждущихъ, плѣне́нныхъ, и о спасе́ніи и́хъ, Го́споду помо́лимся.

О е́же освяти́тися вода́мъ си́мъ си́лою, и дѣ́йствіемъ, и наи́тіемъ Свята́го Ду́ха, Го́споду помо́лимся.

О е́же снизходи́ти на во́ды сія́ очисти́тельному Пресу́щныя Тро́ицы дѣ́йству, Го́споду помо́лимся.

О е́же дарова́тися и́мъ благода́ти избавле́нія, благослове́нію Іорда́нову си́лою, и дѣ́йствомъ, и наи́тіемъ Свята́го Ду́ха, Го́споду помо́лимся.

О е́же сокруши́тися сатанѣ́ подъ нога́ма на́шима вско́рѣ и разори́тися вся́кому совѣ́ту лука́вому, дви́жимому на ны́, Го́споду помо́лимся.

Яко да Госпо́дь Бо́гъ и́зметъ на́съ отъ вся́каго навѣ́та и искуше́нія сопроти́вника и досто́йны содѣ́лаетъ обѣ́щанныхъ бла́гъ, Го́споду помо́лимся.

О е́же просвѣти́тися на́мъ просвѣще́ніемъ ра́зума и благоче́стія, наи́тіемъ Свята́го Ду́ха, Го́споду помо́лимся.

О е́же низпосла́ти Го́споду Бо́гу благослове́ніе Іорда́ново и освяти́ти во́ды сія́, Го́споду помо́лимся.

О е́же бы́ти водѣ́ се́й освяще́нія да́ру, грѣхо́въ избавле́нію, во исцѣле́ніе души́ и тѣ́ла и на вся́кую по́льзу изря́дную, Го́споду помо́лимся.

О е́же бы́ти водѣ́ се́й приводя́щей въ жи́знь вѣ́чную, Го́споду помо́лимся.

О е́же яви́тися се́й отгна́нію вся́каго навѣ́та ви́димыхъ и неви́димыхъ вра́гъ, Го́споду помо́лимся.

О че́рплющихъ и е́млющихъ во освяще́ніе домо́въ, Го́споду помо́лимся.

О е́же бы́ти се́й во очище́ніе ду́шъ и тѣле́съ всѣ́мъ, вѣ́рою и че́рплющимъ же и причаща́ющимся отъ нея́, Го́споду помо́лимся.

О е́же сподо́битися на́мъ испо́лнитися освяще́нія во́дъ си́хъ прича́щеніемъ, неви́димымъ явле́ніемъ Свята́го Ду́ха, Го́споду помо́лимся.

О е́же услы́шати Го́споду Бо́гу гла́съ моле́нія на́съ, грѣ́шныхъ, и поми́ловати на́съ, Го́споду помо́лимся.

О изба́витися на́мъ отъ вся́кія ско́рби, гнѣ́ва и ну́жды, Го́споду помо́лимся.

Заступи́, спаси́, поми́луй и сохрани́ на́съ, Бо́же, Твое́ю благода́тію.

Пресвяту́ю, Пречи́стую, Преблагослове́нную, Сла́вную Влады́чицу на́шу Богоро́дицу и Приснодѣ́ву Марíю, со всѣ́ми святы́ми помяну́вше, са́ми себе́ и другъ дру́га, и ве́сь живо́тъ на́шъ Христу́ Бо́гу предади́мъ.

Ли́къ: Тебѣ́, Го́споди.

Си́мъ глаго́лемымъ, свяще́нникъ та́йно моли́тву сію́ глаго́летъ:

Го́споди Іису́се Христе́, Единоро́дный Сы́не, сы́й въ нѣ́дрѣ Отчи, и́стинный Бо́же, Исто́чниче жи́зни и безсме́ртія, Свѣ́те отъ Свѣ́та, прише́дый въ міръ, е́же просвѣти́ти его́, озари́ на́шу мысль Святы́мъ Твои́мъ Ду́хомъ и пріими́ на́съ, вели́чество и благодаре́ніе Тебѣ́ принося́щихъ о я́же отъ вѣ́ка ди́вныхъ Твои́хъ великодѣ́йствіихъ и е́же въ послѣ́днія вѣ́ки спаси́тельномъ Твое́мъ смотре́ніи, въ не́мже въ на́ше немощно́е и ни́щее одѣ́явся смѣше́ніе и рабо́тнымъ мѣ́рамъ снизше́дый, Иже всѣ́хъ Царю́, еще́ и ра́бскою руко́ю во Іорда́нѣ крести́тися претерпѣ́лъ еси́, да, водно́е естество́ освяти́въ, Безгрѣ́шне, путесотвори́ши на́мъ е́же водо́ю и Ду́хомъ па́ки рожде́ніе и къ пе́рвому на́съ устро́иши свобожде́нію. Его́же Боже́ственнаго та́инства воспомина́ніе пра́зднующе, мо́лимся Тебѣ́, Влады́ко Человѣколю́бче, воскропи́ и на ны́, недосто́йныя рабы́ Твоя́, по Боже́ственному Твоему́ обѣща́нію во́ду чи́сту, Твоего́ благоутро́бія да́ръ, во е́же надъ водо́ю се́ю проше́нію на́съ, грѣ́шныхъ, благопрія́тну бы́ти Твое́ю бла́гостію и благослове́нію Твоему́ е́ю, на́мъ же и всѣ́мъ вѣ́рнымъ лю́демъ Твои́мъ дарова́тися въ сла́ву Свята́го и покланя́емаго Твоего́ и́мене. Яко подоба́етъ Тебѣ́ вся́кая сла́ва, че́сть и поклоне́ніе со Безнача́льнымъ Твои́мъ Отце́мъ и Пресвяты́мъ, и Благи́мъ, и Животворя́щимъ Твои́мъ Ду́хомъ, ны́нѣ, и при́сно, и во вѣ́ки вѣко́въ.

И ре́къ въ себѣ́: Ами́нь. Діа́кону же испо́лнившу ектенію́, начина́етъ свяще́нникъ велегла́сно моли́тву сію́:

Ве́лій еси́, Го́споди, и чу́дна дѣла́ Твоя́, и ни еди́но же сло́во дово́льно бу́детъ къ пѣ́нію чуде́съ Твои́хъ. [Три́жды.]

Ты́ бо, хотѣ́ніемъ отъ не су́щихъ во е́же бы́ти приведы́й вся́ческая, и Твое́ю держа́вою содержи́ши тва́рь, и Твои́мъ про́мысломъ стро́иши мíръ. Ты́, отъ четы́рехъ стихíй тва́рь сочини́вый, четы́рми времены́ кру́гъ лѣ́та вѣнча́лъ еси́. Тебе́ трепе́щутъ у́мныя вся́ си́лы, Тебе́ пое́тъ со́лнце, Тебе́ сла́витъ луна́, Тебѣ́ прису́тствуютъ звѣ́зды, Тебе́ слу́шаетъ свѣ́тъ, Тебе́ трепе́щутъ бе́здны, Тебѣ́ рабо́таютъ исто́чницы. Ты́ просте́рлъ еси́ не́бо, я́ко ко́жу, Ты́ утверди́лъ еси́ зе́млю на вода́хъ, Ты́ огради́лъ еси́ мо́ре песко́мъ, Ты́ ко отдыха́ніемъ возду́хъ пролія́лъ еси́. Ангельскія си́лы Тебѣ́ слу́жатъ, арха́нгельстіи ли́цы Тебѣ́ кла́няются, многоочи́тіи херуви́ми и шестокрила́тіи серафи́ми, о́крестъ стоя́ще и облета́юще, стра́хомъ непристу́пныя сла́вы Твоея́ покрыва́ются. Ты́ бо, Бо́гъ Сы́й Неопи́санный, Безнача́льный же и Неизглаго́ланный, прише́лъ еси́ на зе́млю, зра́къ раба́ пріи́мъ, въ подо́біи человѣ́честемъ бы́въ, не бо терпѣ́лъ еси́, Влады́ко, милосе́рдія ра́ди ми́лости Твоея́, зрѣ́ти отъ діа́вола му́чима ро́да человѣ́ча, но прише́лъ еси́ и спа́слъ еси́ на́съ. Исповѣ́дуемъ благода́ть, проповѣ́дуемъ ми́лость, не таи́мъ благодѣя́нія: естества́ на́шего ро́ды свободи́лъ еси́, дѣ́вственную освяти́лъ еси́ утро́бу рождество́мъ Твои́мъ. Вся́ тва́рь воспѣва́етъ Тя́, я́вльшагося: Ты́ бо, Бо́гъ на́шъ, на земли́ яви́лся еси́ и съ человѣ́ки пожи́лъ еси́, Ты́ Іорда́нскія струи́ освяти́лъ еси́, съ небесе́ низпосла́вый Свята́го Твоего́ Ду́ха, и главы́ та́мо гнѣздя́щихся сокруши́лъ еси́ зміе́въ.

И сіе́ у́бо свяще́нникъ глаго́ля три́жды, и во́ду руко́ю благословля́етъ на кíйждо сти́хъ:

Ты́ у́бо, Человеколю́бче Царю́, пріиди́ и ны́нѣ наи́тіемъ Свята́го Твоего́ Ду́ха и освяти́ во́ду сію́. [Три́жды.]

И да́ждь е́й благода́ть избавле́нія, благослове́ніе Іорда́ново, сотвори́ ю́ нетлѣ́нія исто́чникъ, освяще́нія да́ръ, грѣхо́въ разрѣше́ніе, неду́говъ исцѣле́ніе, де́моновъ всегуби́тельство, сопроти́внымъ си́ламъ непристу́пную, а́нгельскія крѣ́пости испо́лненную, да вси́, почерпа́ющіи и причаща́ющіися, имѣ́ютъ ю́ ко очище́нію ду́шъ и тѣле́съ, ко исцѣле́нію страсте́й, ко освяще́нію домо́въ и ко вся́кой по́льзѣ изря́дну. Ты́ бо еси́ Бо́гъ на́шъ, Иже водо́ю и Ду́хомъ обнови́вый обетша́вшее грѣхо́мъ естество́ на́ше. Ты́ еси́ Богъ на́шъ, водо́ю потопи́вый при Но́и грѣ́хъ. Ты́ еси́ Бо́гъ на́шъ, Иже мо́ремъ свободи́вый отъ рабо́ты фара́они Моисе́омъ ро́дъ евре́йскій. Ты́ бо еси́ Бо́гъ на́шъ, разрази́вый ка́мень въ пусты́ни, и потеко́ша во́ды, и пото́цы наводни́шася, и жа́ждущія лю́ди Твоя́ насы́тивый. Ты́ еси́ Бо́гъ на́шъ, Иже водо́ю и огне́мъ премѣни́вый Иліе́ю Изра́иля отъ пре́лести Ваа́ловы.

Са́мъ и ны́нѣ, Влады́ко, освяти́ во́ду сію́ Ду́хомъ Твои́мъ Святы́мъ. [Три́жды.]

Да́ждь же всѣ́мъ, прикаса́ющимся е́й, и причаща́ющимся, и ма́жущимся е́ю, освяще́ніе, здра́віе, очище́ніе и благослове́ніе.

И спаси́, Го́споди, Раба́ Твоего́ Благочести́вѣйшаго, Самодержа́внѣйшаго, Вели́каго Госуда́ря на́шего Импера́тора [имяре́къ] всея́ Россíи. [Три́жды.]

И Супру́гу Его́, Благочести́вѣйшую Госуда́рыню Императри́цу [имяре́къ]; Ма́терь Его́, Благочести́вѣйшую Госуда́рыню Императри́цу [имяре́къ]; Наслѣ́дника Его́, Благовѣ́рнаго Госуда́ря, Цесаре́вича и Вели́каго Кня́зя [имяре́къ] и ве́сь Ца́рствующій До́мъ.

Спаси́, Го́споди, и поми́луй Святѣ́йшій Прави́тельствующій Всероссíйскій Сѵно́дъ, и сохрани́ и́хъ подъ кро́вомъ Твои́мъ въ ми́рѣ, покори́ и́мъ вся́каго врага́ и супоста́та, да́руй и́мъ вся́, я́же ко спасе́нію проше́нія, и жи́знь вѣ́чную, да и стихíями, и человѣ́ки, и а́нгелы, и ви́димыми, и неви́димыми сла́вится Твое́ пресвятое́ и́мя, со Отце́мъ и Святы́мъ Ду́хомъ, ны́нѣ, и при́сно, и во вѣ́ки вѣко́въ, ами́нь.

Свяще́нникъ: Ми́ръ всѣ́мъ. Ли́къ: И ду́хови твоему́. Діа́конъ: Главы́ ва́ша Го́сподеви приклони́те. Ли́къ: Тебѣ́, Го́споди.

Свяще́нникъ, прекло́нься, мо́лится та́йно:

Приклони́, Го́споди, у́хо Твое́ и услы́ши ны́, Иже во Іорда́нѣ крести́тися изво́ливый и освяти́вый во́ды, благослови́ всѣ́хъ на́съ, и́же приклоне́ніемъ своея́ вы́и назна́менующихъ рабо́тное воображе́ніе, и сподо́би на́съ испо́лнитися освяще́нія Твоего́ причаще́ніемъ воды́ сея́, и да бу́детъ на́мъ, Го́споди, во здра́віе души́ и тѣ́ла.

Возглаше́ніе: Ты́ бо еси́ освяще́ніе на́ше, и Тебѣ́ сла́ву, и благодаре́ніе, и поклоне́ніе возсыла́емъ со Безнача́льнымъ Твои́мъ Отце́мъ, и Пресвяты́мъ, и Благи́мъ, и Животворя́щимъ Твои́мъ Ду́хомъ, ны́нѣ, и при́сно, и во вѣ́ки вѣко́въ. Ли́къ: Ами́нь.

И а́біе, благословля́я во́ду крестови́дно честны́мъ кресто́мъ, погружа́етъ его́ пра́во, низводя́ въ во́ду и возводя́, держа́ его́ обѣ́ма рука́ма, поя́ настоя́щій тропа́рь, во гла́съ пе́рвый:

Во Іорда́нѣ креща́ющуся Тебѣ́, Го́споди,* Тро́ическое яви́ся поклоне́ніе:* Роди́телевъ бо гла́съ свидѣ́тельствоваше Тебѣ́,* возлю́бленнаго Тя́ Сы́на имѣну́я,* и Ду́хъ въ ви́дѣ голуби́нѣ* извѣ́ствоваше словесе́ утвержде́ніе.* Явле́йся Христе́ Бо́же* и мíръ просвѣще́й, сла́ва Тебѣ́.

Пѣвце́мъ то́ же пою́щимъ. Па́ки и второ́е та́кожде кресто́мъ зна́менуетъ во́ду и тропа́рь пое́тъ то́й же. И пѣвце́мъ то́ же пою́щимъ. И тре́тіе та́кожде. И взе́мъ свяще́нникъ свяще́нную во́ду на блю́до и обратя́ся на за́падъ лице́мъ, въ лѣ́вой руцѣ́ держа́ честны́й кре́стъ, а въ пра́вой васильки́, [кропи́тъ крестообра́зно на вся́ страны́]. И прихо́дитъ пре́жде настоя́тель и цѣлу́етъ честны́й кре́стъ, и зна́менуетъ его́ свяще́нникъ по лицу́ василько́мъ со свяще́нною водо́ю. Та́же свяще́нницы прихо́дятъ по чи́ну своему́. По тому́ же чи́ну и вся́ бра́тія. Пое́тся же тогда́ тропа́рь: Во Іорда́нѣ креща́ющуся Тебѣ́, Го́споди.., мно́гащи, до́ндеже освяти́тся вся́ бра́тія водны́мъ кропле́ніемъ. И а́біе вхо́димъ во хра́мъ, и пое́мъ самогла́сенъ:

Сла́ва, и ны́нѣ, гла́съ 6:

Воспои́мъ, вѣ́рніи,* е́же о на́съ Бо́жія благодѣя́нія вели́чество:* о на́шемъ бо прегрѣше́ніи бы́въ Человѣ́къ,* на́шимъ очище́ніемъ очища́ется во Іорда́нѣ,* Еди́нъ Чи́стый и Нетлѣ́нный,* освяща́яй мене́ и во́ды* и главы́ зміе́въ сокруша́яй въ водѣ́.* Почерпе́мъ у́бо во́ду съ весе́ліемъ, бра́тіе:* благода́ть бо Ду́ха вѣ́рно почерпа́ющимъ* неви́димо подава́ется отъ Христа́ Бо́га* и Спа́са ду́шъ на́шихъ.

Та́же: Бу́ди имя Госпо́дне… [Три́жды.]. И псало́мъ 33-й: Благословлю́ Го́спода на вся́кое вре́мя…
И пре́жде пи́вше освяще́нную во́ду, взе́млемъ отъ свяще́нника анти́доръ.

И быва́етъ соверше́нный отпу́стъ:

Иже во Іорда́нѣ крести́тися изво́ливый отъ Іоа́нна, на́шего ра́ди спасе́нія, Христо́съ, Истинный Бо́гъ на́шъ, моли́твами Пречи́стыя Своея́ Ма́тере и всѣ́хъ святы́хъ, поми́луетъ и спасе́тъ на́съ, я́ко Бла́гъ и Человѣколю́бецъ. [Ами́нь.]

Источникъ: Требникъ. — М.: Въ Сѵнодальной Типографіи, 1884. — Л. 67 – 72.

 

ИСТОЧНИК